10 نصائح للمضيف الشاطر

دول 10 نصائح للمضيف الشاطر، لو اتبعهم هيكون ارتفاع أسهم المقهى أو المطعم اللي هو جزء من فريق العمل جواه.. وبالتالي ارتفاع أسهمه هو شخصيا..

10 نصائح للمضيف الشاطر

نصائح للمضيف الشاطر

مِن أهم عناصر الضيافة في أي مطعم أو فندق هو المُضيف؛ ومفيش شك إن أغلب الإدارات دايما بيدوروا على المُضيف الشاطر..

وعلشان تبقى مضيف شاطر؛ فيه ١٠ نصائح أساسية؛ نصائح للمضيف الشاطر؛ لو اتبعتها هتأهلك للنتيجة دي..
النصائح دي ما بين حاجات لازم تعملها، وحاجات إوعى تعملها.. هنقولك عليها في التدوينة هنا.

أولا: الحاجات اللي لازم تعملها

1-         ابتسم دايما في وش الزبائن، وخليك بَشوش مهما حصل، أو مهما كنت بتمر بظروف صعبة.. المضيف الشاطر بيفصل بين حياته الشخصية وبين الشغل.. وعلشان تقدر تبني علاقة مُثمرة مع الزبائن؛ لابد تكون إنسان بشوش، ودايما بيصَدَّر طاقة إيجابية، ودايما مُبتسم.

2-         اتكلم اللغة اللي انت متمكن منها.. مفيش شك إن التواصل اللغوي مهم جدا مع الزبائن، وعلشان تبقى مضيف شاطر لازم تكون بتتكلم بلُغَة سهلة ومفهومة ليك وللزبائن.. وعلشان غالبا هتشتغل في مطاعم عالمية، وهتقابل زبائن بجنسيات مختلفة؛ لازم تحسّن من لغتك الإنجليزية، وتكون مُتَمَكِّن فيها بجانب اللغة الأم...
مش بس كدة؛ إحنا بننصحك دايما تتواصل باللغة الأم لو الزبائن عرب؛ أما لو الزبائن أجانب فلابد تستخدم لغتك التانية - وهي الإنجليزية - مهما اختلفت الجنسيات.. بلاش تحاول تتكلم بلغتهم الأم لو مكُنتش مُتمكِّن منها كويس جدا.

3-         استخدم دايما الكلمات السحرية في عرض أطباقك أو مشروباتك..
علشان تبقى مُضيف شاطر وبياع شاطر؛ لازم تجهز كلمات سحرية تلفت نظر الزبائن، وتجذب انتباههم.. والكلمات السحرية دي مش هتعرفها إلا لما تكون مُتمكِّن كويس جدا من معلوماتك عن الأصناف اللي بتقدمها؛ وبالتالي هتقدر تنصح الزبائن، وترشّح الأطباق المُناسبة، واللي هتحوز على إعجاب الزبائن ورضاهم، وهتعلِّي من مبيعات المطعم.

4-         علشان تبقى مُضيف شاطر؛ دايما ارجع للمُشرِف بتاعك لو عندك أي لَبْس في معلوماتك عن الأصناف اللي بتقدمها، وخلّي دايما فيه حلقة وَصْل بينك وبين الإدارة، وبلاش تجاوب على سؤال للزبائن إلا لو كنت فاهم كويس الإجابة، ولو مش فاهم؛ ارجع للمشرف.

5-         المضيف الشاطر هو اللي بيتّبع خطوات الضيافة الصح، والمواصفات القياسية العالمية، أو السياسة التشغيلية للمطعم مهما كانت الظروف، ومهما زاد عدد الزبائن..
لابد كل زبون ياخد الخدمة الصح، المناسبة في كل مرة بيزور فيها المطعم.

ثانيا: إوعى تعمل

1-         إوعى تزعج الزبائن إذا كانوا مشغولين بمُكالمة تليفونية مثلا؛ أو في اجتماع.. وإذا حابب تشرح أو تاخد طلب من الزبائن؛ تواصل بصريا معاهم في البداية، وبعدين اختار الصوت والمُستَوى اللازمين للفت انتباهه؛ وبعدين اتكلم.

2-         إوعاك من الإفراط في مُصطلحات الاعتذار؛ زي (آسف) و(يا فندم) و(بعد إذن حضرتك).. المضيف الشاطر هو اللي يعرف إمتى يعتذر.. كمان الإفراط في الاعتذار مش بيحل المشاكل، بالعكس بيوحي للزبائن بافتقار المضيف للكفاءة اللازمة، وبيخليه يفقد الثقة في المضيف وفي المطعم.

3-         إوعى تقول للزبون (معرفش) أو (لأ؛ مش موجود).. علشان تبقى مُضيف شاطر خليك دايما إيجابي، وإذا مكنش عندك معلومة أو إجابة كافية للعميل؛ استأذن وارجع للمدير بدون ما تقول معرفش؛ وإذا مش قادر تلبي رغبة الزبون في طبق أو مشروب مُعَيَّن هو طلبه؛ رشحله طبق أو مشروب مشابه، وانصحه بتناوله باستخدام كلماتك السحرية، وبلاش تقول (لأ؛ طلبك مش عندنا).

4-         إوعى تستخدم أصابع إيدك في شرح، أو الإشارة للزبائن على شيء ما؛ بعض الإشارات بتدل في أغلب الثقافات على قلة الاحترام، وبتدي كمان إيحاء سلبي ممكن يقلل من رضاء الزبائن؛ على عكس استخدام كف الإيد بالصوابع المفرودة جنبا إلى جنب؛ واللي بتدل على أدب واحترام المضيف؛ وبالتالى بتبين مستوى الخدمة والمضيفين.

5-         إوعى توعد الزبائن بمواعيد محددة لتلبية طلباتهم، أو تقديم الأطباق الراغبين فيها.. علشان تبقى مُضيف شاطر متخليش الزبائن تنتظر مواعيد محددة، وخلي إجاباتك دايما في المتوسط.

أخيرا؛ إحنا قدمنا نصائح للمضيف الشاطر عشان تخليك دايما واثق في نفسك، وفي مكانك؛ وخليك دايما حاضر بمعلوماتك ومهارات التواصل والبيع، وذهنك دايما حاضر لتلبية رغبات وإرضاء الزبائن.. علشان تبقى مضيف شاطر.

اقرأ أيضا

ماذا يُقصد بالحمية الغذائية والحمية النباتية؟ ولماذا يجب على العاملين في الضيافة فهم الحميات المُتَّبَعَة غذائيا؟

خدمة الأغذية والمشروبات Food and Beverage | أحد أهم الخدمات في صناعة الضيافة

النظام الغذائي الخالي من الغلوتين | Gluten Free

المُضيف / كابتن الصالة | المهام الوظيفية